ಸುದ್ದಿಯಲ್ಲಿ ಏಕಿದೆ? 1970ರ ದಶಕದಿಂದ 7,516.60 ಕಿಲೋಮೀಟರ್ ಎಂದು ನಂಬಿದ್ದ ಭಾರತದ ಅಧಿಕೃತ ಕರಾವಳಿಯ ಉದ್ದವನ್ನು ಈಗ ಮರು ಲೆಕ್ಕಾಚಾರ ಮಾಡಲಾಗಿದ್ದು, ಅದು ಏರಿಕೆಯಾಗಿ 11,098.81 ಕಿಲೋಮೀಟರ್‌ಗಳಿಗೆ ಏರಿದೆ ಎಂದು ಭಾರತೀಯ ಸಮೀಕ್ಷಾ ಸಂಸ್ಥೆ (ಸರ್ವೇ ಆಫ್ ಇಂಡಿಯಾ) ಘೋಷಿಸಿದೆ.

ಮುಖ್ಯಾಂಶಗಳು

• ಈ ಹೆಚ್ಚಳವು ದೇಶದ ಭೂಭಾಗದಲ್ಲಿ ಭೌತಿಕ ಬದಲಾವಣೆಯಿಂದ ಆಗಿಲ್ಲ; ಬದಲಿಗೆ ಆಧುನಿಕ ಅಳತೆ ವಿಧಾನಗಳು ಮತ್ತು ಸುಧಾರಿತ ತಂತ್ರಜ್ಞಾನಗಳನ್ನು ಬಳಸಿದ್ದರಿಂದ ಆಗಿದೆ. ಕರಾವಳಿಯ ಸೂಕ್ಷ್ಮ ವಿವರಗಳನ್ನು ಈಗ ಹಿಂದೆಂದಿಗಿಂತಲೂ ಹೆಚ್ಚು ನಿಖರವಾಗಿ ಅಳೆಯಲಾಗಿದೆ.
• ಈ ಮಹತ್ವದ ಕಾರ್ಯದಲ್ಲಿ ಭಾರತೀಯ ಸಮೀಕ್ಷಾ ಸಂಸ್ಥೆ, ವಿಜ್ಞಾನ ಮತ್ತು ತಂತ್ರಜ್ಞಾನ ಇಲಾಖೆ (DST) ಮತ್ತು ರಾಷ್ಟ್ರೀಯ ಜಲವಿಜ್ಞಾನ ಸಂಸ್ಥೆ (ನ್ಯಾಷನಲ್ ಹೈಡೋಗ್ರಾಫಿಕ್ ಆರ್ಗನೈಸೇಷನ್) ಸೇರಿದಂತೆ ಹಲವು ಸರ್ಕಾರಿ ಸಂಸ್ಥೆಗಳು ಸಹಕರಿಸಿವೆ.
• ಇನ್ನು ಮುಂದೆ, ಭಾರತದ ಕರಾವಳಿ ಉದ್ದವನ್ನು ಪ್ರತಿ 10 ವರ್ಷಗಳಿಗೊಮ್ಮೆ ಪರಿಷ್ಕರಿಸಲಾಗುವುದು.

ಹೊಸ ಅಳತೆಗೆ ಕಾರಣಗಳು

ಈಗ ಕರಾವಳಿ ರೇಖೆಯನ್ನು ‘ಉಬ್ಬರವಿಳಿತದ ರೇಖೆ’ (ಹೈ-ವಾಟರ್ ಲೈನ್) ಆಧಾರದ ಮೇಲೆ ಅಳೆಯಲಾಗಿದೆ. ಇದಕ್ಕಾಗಿ 2011ರ ಎಲೆಕ್ಟ್ರಾನಿಕ್ ನ್ಯಾವಿಗೇಷನ್ ಚಾರ್ಟ್‌ಗಳನ್ನು (ENCs) ಬಳಸಲಾಗಿದೆ. ಹಿಂದೆ 1:4,500,000 ಅಥವಾ ಅದಕ್ಕಿಂತ ಚಿಕ್ಕ ಪ್ರಮಾಣದ ನಕ್ಷೆಗಳನ್ನು ಬಳಸಲಾಗುತ್ತಿತ್ತು. ಈಗ 1:250,000 ಎಂಬ ದೊಡ್ಡ ಪ್ರಮಾಣದ ನಕ್ಷೆಗಳನ್ನು ಬಳಸಲಾಗಿದೆ. ಈ ದೊಡ್ಡ ಪ್ರಮಾಣದ ನಕ್ಷೆಗಳು ಹಿಂದೆ ಕೈಬಿಟ್ಟಿದ್ದ ಅನೇಕ ಸಣ್ಣ ವಿವರಗಳನ್ನೂ ಸೆರೆಹಿಡಿಯಲು ಸಹಾಯ ಮಾಡಿವೆ.

ಆಧುನಿಕ ಭೌಗೋಳಿಕ ಮಾಹಿತಿ ವ್ಯವಸ್ಥೆ (GIS) ಸಾಫ್ಟ್‌ವೇ‌ರ್, ಲಿಡಾ‌ರ್-ಜಿ.ಪಿ.ಎಸ್. (LIDAR-GPS) ಬಳಸಿ ನಕ್ಷೆ ತಯಾರಿಸಿರುವುದಕ್ಕೆ ಹಲವೆಡೆ ಪ್ರೋನ್ ಇಮೇಜಿಂಗ್ ಮತ್ತು ಉಪಗ್ರಹದ ಬಳಕೆಯೊಂದಿಗೆ ಅಳತೆ (ಸ್ಯಾಟಲೈಟ್ ಅಲ್ಟಿಮಿಟ್ರಿ) ತಂತ್ರಜ್ಞಾನಗಳನ್ನು ಬಳಸಿದೆ.

ದ್ವೀಪಗಳ ಸೇರ್ಪಡೆ: ಈ ಹೊಸ ಅಳತೆಯಲ್ಲಿ 1,298 ಕಡಲಾಚೆಯ ದ್ವೀಪಗಳು ಮತ್ತು ಸಣ್ಣ ದ್ವೀಪಗಳ (1,059 ದ್ವೀಪಗಳು ಮತ್ತು 239 ಸಣ್ಣ ದ್ವೀಪಗಳು) ಕರಾವಳಿ ಉದ್ದವನ್ನೂ ಸೇರಿಸಲಾಗಿದೆ.

ಈ ನವೀಕರಿಸಿದ ಕರಾವಳಿ ಉದ್ದವು ದೇಶದ ಹಲವು ಪ್ರಮುಖ ವಿಷಯಗಳ ಮೇಲೆ ಪರಿಣಾಮ ಬೀರಲಿದೆ.

ಇದು ಕಡಲ ಭದ್ರತೆ, ಆರ್ಥಿಕ ವಲಯ ವಿಭಜನೆ, ಕರಾವಳಿ ನಿಯಂತ್ರಣ ಮತ್ತು ನಿರ್ವಹಣೆ, ಪರಿಸರ ನೀತಿ ಮತ್ತು ರಾಷ್ಟ್ರೀಯ ಭದ್ರತಾ ಯೋಜನೆಗಳಿಗೆ ಬಹಳ ಮುಖ್ಯವಾಗಿದೆ.